Die FAK het met skok verneem van die afsterwe van ‘n geliefde koerantman en Afrikaanse taalpionier.
Dit is met diepe hartseer dat die Federasie van Afrikaanse Kultuurvereniginge (FAK) van Dirk Kok, ‘n geliefde figuur in Suid-Afrika se joernalistieke gemeenskap moet afskeid neem. Kok, wat dapper ‘n stryd teen kanker gestry het, is op 28 Julie, in die ouderdom van 56 oorlede.
Kok se reis met Volksblad het in 1997 begin, waar hy sy loopbaan as algemene verslaggewer aangepak het.
Sy toewyding en vaardigheid het hom deur verskeie rolle gelei. “Dirk was ‘n oue soort joernalis, ‘n koerantman soos ons na hulle verwys. Hy het sy tande by Volksblad geslyp as misdaad-, hof en politieke verslaggewer. Dit is ‘n lewenswys, om klipharde stories te kry en baie ure oortyd te werk en kontakte te maak. Daar is min sulke joernaliste oor,” sê Charles Smith, nuushoof van Netwerk24/Volksblad in die Vrystaat en Noord-Kaap.
Sy toewyding en kundigheid het uitgeloop op sy aanstelling as redakteur aan die begin van 2023, ‘n rol wat hy met onwrikbare passie aangegryp het. Kok het ook die rol van streekredakteur vir Netwerk24 opgeneem, wat sy invloed in die veld verder uitgebrei het.
Kok se nalatenskap is nie net in sy wesenlike bydraes tot die joernalistiek nie, maar ook in die warmte en toewyding wat hy aan sy werk gebring het. “Die feit dat hy vir ‘n jaar en ‘n half die Volksblad op PDF met ‘n klein span uitgegee het, en dit die koerant was, is werklik uitstekend. Dit is ‘n kosbare kleinood in Afrikaans,” meen Smith.
Hy laat sy geliefde vrou Mientjie, hul seuns Adam, Ben, Zirk, Jos en Daniel, asook sy ouers Joe en Eileen, en sy suster Estelle agter.
Om van so groot gees in Afrikaans te verloor is bitter hartseer en die FAK dink spesiaal aan sy familie en gesin in hierdie moeilike tyd,” sê Marianne Pouwels, mediabeampte van die FAK.
Smith sê: “Dirk het in gehalte geglo en hy is deel van die mense wat oor dekades die spesifieke handelsmerk Volksblad-storie ontwikkel het: Lekker mensestories van ons mense en hul doen en late. Afrikaanse stories.”
Dirk Kok se heengaan is ‘n groot verlies vir almal wat hom geken het en vir die wêreld van joernalistiek. Ons gedagtes is by sy familie in hierdie moeilike tyd. Sy nagedagtenis sal gekoester word deur sy kollegas, vriende en almal wat die voorreg gehad het om saam met hom te werk. “Hy gaan baie as mens gemis word en sy bydrae vir Afrikaanse joernalistiek en Afrikaans as sodanig gaan baie gemis word,” het Smith afgesluit.
