OOR DIE FAK-VTM KUNSGALERY
Die FAK/VTM Kunsgalery is ’n permanente kunsuitstalling – met die primêre doel om ’n grondige waarderingskultuur vir goeie kuns, drama en musiek onder die Afrikanergemeenskap te hervestig. Die galery werk ten nouste saam met die FAK en is gehuisves in die Senotaafsaal van die Voortrekkermonument. Skilderye en beeldhouwerke van ’n groot aantal bekende kunstenaars, sowel as belowende opkomende kunstenaars, word uitgestal en ook te koop aangebied. Die galery is ook so uitgelê dat dit ’n ruimte skep vir die aanbied van kleiner musiekuitvoerings en toneelstukke. Die doelwit van die galery is om die kunswaarderingskultuur onder die Afrikanergemeenskap te herstel en die hedendaagse meesters die erkenning te gee wat hulle toekom. Die galery teiken hedendaagse en toekomstige meesters om ’n waardetoevoeging te kom maak tot die Suid-Afrikaanse kunsnalatenskap.
ONTMOET ONS KUNSTENAARS
ALAIN NORTJÉ
![Alain](https://fak.org.za/wp-content/uploads/2024/07/Alain.png)
Alain Nortjé het in 1983 ’n BA (Ed) Beeldende Kunste-graad aan die Universiteit van Pretoria verwerf. Hy het begin as kunsonderwyser, het ’n kollege-dosent geword en in 1995 die Centurion Kunssentrum in Pretoria geopen.
Sy werk word verteenwoordig in verskeie korporatiewe versamelings (bv. Telkom, ABSA), opvoedkundige instellings en stadsrade, en in private versamelings plaaslik en in die buiteland. Benewens uitgesoekte bomarkgalerye in Suid-Afrika (soos Johan Smit, Hyde Park Gallery, Voir, ens.) en die Nasionale Kunsmuseum in Pretoria, stal bekende galerye in Salzburg, München en Wene tans sy werk uit.
Alhoewel sy styl uiteenlopend is, vorm Alain se fassinasie met Suid-Afrikaanse landskappe, en met spesifieke verwysing na mensgemaakte merke op die landskap, die hooftema regdeur sy werk. Fisiese grense (soos geroeste doringdraadheinings) kom gereeld in sy skilderye voor en hou verband met beide grense wat in landskappe gevind word, sowel as geestelike grense waarmee die kunstenaar gekonfronteer kan word.
CHRISTELLE JANSE VAN VUUREN
![Christelle – Profiel Foto](https://fak.org.za/wp-content/uploads/2024/07/Christelle-Profiel-Foto.jpeg)
Christelle was vir die grootste deel van haar lewe in die skoonheidsindustrie, en slegs as ’n stokperdjie skilderye geskilder en soms verkoop. In 2021 het sy verhuis na Leeupoort, en einde 2022 besluit om kuns as beroep op te neem. Christelle het besluit om dit te doen gebaseer op haar kinderlewe op ’n Bosveldplaas. Die verskeie elemente wat sy beleef en ervaar het, maak grootliks deel van haar identiteit en dit is waarin sy die wonder en skoonheid van die skepping vind. In landskappe, wildlewe en plaaslewe. Christelle se medium van keuse is olieverf op gestrekte doek.
DAWIE FOURIE
![Dawie](https://fak.org.za/wp-content/uploads/2024/07/Dawie.png)
Dawie is in 1964 in Johannesburg gebore. Dawie is lief vir die veld en wild solank as wat hy kan onthou. Hy het in natuurbewaring en veeartsenykundige navorsing gewerk voordat hy 33 jaar gelede ’n voltydse loopbaan in kuns begin het. Dawie het ses solo-uitstallings, 30 plus groepuitstallings en ses private uitstallings gehad, insluitend uitstallings in die VSA, Frankryk, Dubai, Spanje en Noorweë. Sy werk is in baie private en korporatiewe versamelings, insluitend die Coca-Cola-maatskappy, Suid-Afrikaanse Brouerye, Suid-Afrikaanse Regering, insluitend die Suid-Afrikaanse Nasionale Parkeraad en die Departement van Kuns en Kultuur. Ook die private versamelings van die Bank of Canada, Joachim Chisano (voormalige president van Mosambiek), Harber Wildlife Museum en Tottenham Hot Spurs Football Club, om maar ’n paar te noem.
ELSA CORNELISSEN
![Elsa](https://fak.org.za/wp-content/uploads/2024/07/Elsa.png)
Elsa se kuns is ’n verlengstuk van haarself en deur haar kuns kon sy haar emosies en lewenservaring kanaliseer om as mens in haarself te groei.
Elsa se hoofgenre van werk is wildlewe, Simboliese Realisme, Emosioneel Ekspressiewe Portrette en Naakstudies, met haar voorkeurmedium as akriel.
Sy is egter goed vertroud met baie verskillende genres en mediums en deel haar kennis met ander deur middel van haar kunsklasse.
Sedert sy in 1980 haar BA in Beeldende Kuns aan die Universiteit van Pretoria voltooi het, het sy kuns by verskeie hoërskole en tegniese kolleges gegee, verskeie eenpersoon- en groepuitstallings gehou, privaat kunsklasse aan volwassenes en kinders gegee. Na ’n paar jaar in die onderwys, het sy dit opgegee om haarself ten volle aan skilderkuns toe te wy, en het net elke nou en dan klasse aangebied.
Elsa Cornelissen is ’n bekroonde kunstenaar wat al 38 jaar in die besigheid is, met ’n BA en HEd in Beeldende Kunste aan die Universiteit van Pretoria.
ELSABÉ PIENAAR
![Elsabe](https://fak.org.za/wp-content/uploads/2024/07/Elsabe.png)
Elsabé Pienaar is ’n kunstenaar van Hartbeespoort, wat bekroon is as ’n Top 25 Finalis in die ARTi Galery Kunskompetisie 2023!
Elsabé beskryf haar kuns as figuratief met ’n abstrakte element, al spog haar portefeulje met ’n groot versameling kreatiewe werke en projekte. Na voltooiing van haar studies het sy ’n pos by die destydse Transvaalse Museumdiens ingeneem en nie net aan museumuitstallings gewerk nie, maar aan verskeie historiese restourasieprojekte saamgewerk. Sy plaas haar mees uitdagende projek as die restourasie van die Paleis van Justisie op Kerkplein in Pretoria, vanweë die grootte van die gebou en blote historiese betekenis wat ’n blywende indruk op haar gelaat het.
Vir die laaste 15 jaar gee sy kunsklasse vir volwassenes en kinders, wat haar kerngeloof in haar verpligting eerbiedig en dit is om die kennis wat sy besit, te deel.
GERRIT PITOUT
![Gerrit](https://fak.org.za/wp-content/uploads/2024/07/Gerrit.png)
Gerrit Pitout is op 2 Januarie 1953 in Klerksdorp gebore en het in Barberton gematrikuleer. Hy het aan die Onderwyskollege van Pretoria gestudeer, en met verdere studie aan die Universiteit van Suid-Afrika het hy sy honneurs in kuns verwerf. Hy het ook sy FPSSA-genootskap in fotografie verwerf en verskeie nasionale en internasionale aanvaardings verwerf.
Sy loopbaan as professionele kunstenaar strek oor meer as 50 jaar en hy het uitstallings in Amerika, Israel en regoor Suid-Afrika gehad. Die kunstenaar het die voorreg gehad om saam met groot name soos Zakkie Eloff, Dino Paravano, Mel Brigg, Lee Voight en vele ander uit te stal.
Kunstenaars wat ’n groot invloed op sy werk gehad het, was Pierneef, Gregoire Boonzaier en Pieter Wenning.
Gerrit het sy eerste solo-uitstalling op die jong ouderdom van 17 by Plaston naby Nelspruit gehou. Hy het bekend geword deur sy kenmerkende hantering van waterverf, asook sy olieverfskilderye van Sossusvlei in die Namib en Suid-Afrikaanse bosveld.
Gerrit se jongste opdrag was vir die ikoniese Voortrekkermonument in Suid-Afrika.
INGRID FOUCHE
![Ingrid](https://fak.org.za/wp-content/uploads/2024/07/Ingrid.png)
Die Afrika-bos was Ingrid se tuiste tydens haar kinderjare, wat ’n diep liefde vir die natuur en sy weelderige oorvloed by haar gekweek het.
Sonder formele kunsopleiding het sy haar loopbaan as kommersiële fotograaf begin. Sy was egter teruggetrek na die wilde plekke en het in die Zambezi-vallei en in Chobe, Botswana, as ’n gids vir buitelandse toeriste gewerk totdat sy in die 80’s na Suid-Afrika verhuis het.
Sy skilder nou voltyds in olie, akriel en sagte pastelle en stal saam met haar seun Leon by plaaslike skoue in Suid-Afrika uit.
Afgesien van Afrika-wildlewe, spesialiseer Ingrid ook in die verf van Nguni-beeste en -perde.
Ingrid se kunswerke word akkuraat en evokatief weergegee terwyl sy haar verlustig in die detail van die perfekte skoonheid en uniekheid van haar onderwerpe.
JACQUES MÜLLER
![Jaques](https://fak.org.za/wp-content/uploads/2024/07/Jaques.png)
Jacques Müller, die oudste van twee broers, is in 1980 in Pretoria gebore. Hy matrikuleer aan die Hoërskool Zwartkop in Centurion waarna hy in 2004 ’n nasionale diploma in beeldende kuns aan die destydse Technikon van Pretoria verwerf, waar hy in beeldhou en skilderkuns spesialiseer.
Jacques put inspirasie uit die natuur, die lewe in die algemeen en die onvermydelike proses van verganklikheid. Sy skilderye en beelde “leef” in vrede saam deur die gebruik van abstrakte elemente soos kleur in sy skilderye en beide organiese en anorganiese voorwerpe in sy beelde om ’n realistiese geheelbeeld te skep. Die kortstondigheid van die lewe is duidelik sigbaar in sy werke waar dit nooit perfek afgerond is nie, en sommige met gate spog om die onvermydelikheid van tyd te beklemtoon.
Jacques maak beleggingsbeeldhou en skilderwerk in opdrag van korporatiewe maatskappye en private versamelaars. Sy werk is ingesluit in verskeie versamelings regoor Suid-Afrika, Australië, Italië, Dubai en die VSA.
Al verkies Jacques om “uit klip te kap”, is hy ’n uiters alsydige kunstenaar. Hy kombineer veral klip met sy bronsbeelde. Jacques meen daar is ’n simbiose in dié materiale en die naamloosheid in sy beelde. As hy nie beeldhouwerk doen nie, skilder hy graag met olie en waterverf.
JANET VAN WYK
![Janet](https://fak.org.za/wp-content/uploads/2024/07/Janet.png)
Janet is ’n selfgeleerde kunstenaar wat in Marloth Park, langs die pragtige Krugerwildtuin, woonagtig is. Sy vier die skoonheid van natuurlewe en landskappe deur haar rou, pretensielose en fotorealistiese skilderye. Haar fassinasie met skilderkuns het in 2016 begin terwyl sy tussen die eksentrieke Hantamberge in die Karoo gewoon het, met die begeerte om haar pragtige omgewing met hul unieke stories vas te vang. Haar oog vir detail en nuanse het gou haar kommissies van plaaslike en landwye kliënte gekry ná ’n suksesvolle eerste groepuitstalling by haar dorp se fees, wat in blootstelling gegroei het en haar werk aan ’n wyer gehoor bekend gestel het. In 2019 het sy en haar man na Marloth Park verhuis waar ’n opdrag vir ’n olifantskildery die begin was van haar intrige manier om wild lewend te maak.
JOHAN KOK
![Johan](https://fak.org.za/wp-content/uploads/2024/07/Johan.png)
Johan Kok is in 1954 in Zimbabwe gebore, en het in 1961 na Suid-Afrika verhuis. Van jongs af het Johan dit geniet om te teken maar het nooit gedink om kuns ’n loopbaan te maak nie. Derhalwe het hy BSc (Boukunde) gaan studeer en ’n beroep in die bou- en fasiliteit bestuur gevolg. Die behoefte om sy kunstalent te ontwikkel, het al sterker geword en in 2010 besluit hy om voltyds te begin skilder.
Met geen formele kunsopleiding nie, het Johan sy kennis van kuns en skilder verbreed deur kunsboeke te lees, werkswinkels by te woon, video’s te kyk en baie “foute” te maak.
Hoewel hy soms in waterverf werk, is olie steeds sy medium van keuse. Johan skilder graag landskappe maar doen ook soms stillewes en portrette.
Die meeste van sy werk word in die ateljee gedoen maar as hy die geleentheid kry, vat hy sy esel uit om in die natuur (plein air) te skilder.
Wat Johan inspireer, is die wonder van God se skepping … en hoe lig ’n gewone toneel in iets baie besonders kan omtower.
Johan werk tans vanaf sy ateljee in Centurion.
KOBUS MÖLLER
![Kobus](https://fak.org.za/wp-content/uploads/2024/07/Kobus.png)
Kobus se skilderye weerspieël ’n intieme kennis van die Afrika-landskap, ’n kennis wat opgedoen word deur dit te verken. Hy is gebore en getoë op ’n plaas buite Fort Victoria (nou Masvingo) in Zimbabwe.
Sy werke is by internasionale kunsgalerye in Afrika, Europa, China en die Verenigde State uitgestal. As professionele kunstenaar is Kobus in Sweedse, Amerikaanse, Duitse en Suid-Afrikaanse publikasies gepubliseer. Sy kunswerke het grootliks gepryk in hoofartikels wat in meer as 50 internasionale tydskrifte gepubliseer is. Hy het was ook die ontvanger van baie gesogte toekennings.
Kobus se werk getuig van ’n totale toewyding. Hy is betower deur die skepping soos dit in sy geliefde Afrika gemanifesteer word. Hy onderdompel homself in ’n volledige ervaring van die besienswaardighede, geluide, reuke en selfs die skrape en jeuk van dorings en insekte.
Kobus lok die waarnemer se verbeelding om die natuur te ontdek soos dit is. In sy eie woorde daag hy elkeen van ons uit: “Mag jy stilstaan om die rots waar te neem waarteen jy jou toon gestamp het, die dorings wat jou gekrap het en die droë gras wat jou vel laat jeuk het. Mag jy ’n waardering ontwikkel vir die skoonheid van die eenvoudige dinge en mag jy die ontsagwekkende gawe van sig herontdek.”
LUCAS DE WIT
![Lucas](https://fak.org.za/wp-content/uploads/2024/07/Lucas.png)
Lucas de Wit is ’n skilder van Pretoria wat lief is vir portrette, stillewes en natuurtonele. Na skool het hy opleiding onder Elizabeth Riding ontvang in die verftegnieke van die ou meesters. In 2006 het Lucas self begin klasgee en onder die vaandel van die Klassieke Skildersgilde begin uitstal. In 2013 het Chris Tugwell vir Lucas aan John Contat, die bekende kunshandelaar, voorgestel en het hy vir John begin skilder. Van daar af het Lucas se fokus verskuif van portrette na die vele gesigte van die bosveld. Sy bosveldtonele neem jou op ’n kits-“safari”, met sagte lugtonele, stowwerige grondpaaie, droë gras en treffende doringbome. Sy portrette en stillewes kommunikeer sy onderwerpe getrou, hoewel dit in breë trekke ontrafel wat dit ’n meer moderne aanslag gee. Intussen bied Lucas werkswinkels aan om sy liefde vir skilder met ander te deel.
LUTE VINK
![Lute](https://fak.org.za/wp-content/uploads/2024/07/Lute.png)
So ver terug as wat hy kan onthou, was Lute altyd besig om te skets. Sy voltydse professionele kunsloopbaan het in 1989 begin toe hy ’n mark vir wildkuns ontdek het. Baie skilderye later het hy hom in die bevoorregte posisie bevind waar sy werk hoog in aanvraag geraak het. Hy put groot plesier uit wild en die natuur en respekteer elke aspek daarvan. Lute voel geëerd om te sê dat sy werk oral goed aanvaar word. Sy skilderye hang in private en maatskappyversamelings wêreldwyd en hy is gekrediteer en gepubliseer in talle tydskrifte en publikasies.
“Ek wil graag aanhou skilder solank ons die skoonheid van die natuur om ons het en sal altyd streef na verbetering in my werk. Ek weet nie hoe my werk sal ontwikkel nie, maar dít weet ek … dit sal altyd ’n eer wees om my talent met die publiek te deel.
“Ek hoef nie regtig inspirasie te vind om te doen wat ek doen nie. Ek doen net wat ek die beste weet,” sê Lute.
Lute, BBC-kunstenaar van die jaar 2013-finalis, het die nuwe publikasie van The Jungle Book geïllustreer. Hierdie beperkte uitgawe-boek is aan die einde van 2015 deur Britse onafhanklike uitgewers Books Illustrated vrygestel. Die fyn versamelaarshandgebinde boek is genommer en geteken deur die kunstenaar en afgewerk in ’n luukse aanbiedingsboks. Lute het die eerste Suid-Afrikaanse kunstenaar geword wat die illustrasies vir so ’n publikasie gedoen het.
NIC GROBLER
![Nic](https://fak.org.za/wp-content/uploads/2024/07/Nic.png)
As Nic vandag terugkyk, dan besef hy net dit was ’n groot voorreg om in Vryheid te kon skoolgaan, eers in Nuwe Republiek Laerskool en later in Vryheid Hoërskool. Nic het einde 1963 gematrikuleer.
Wat hy gemis het, was dat daar nie formele kunsopleiding was nie. Hy wou skeppend besig wees en het op eie houtjie beeldhou gedoen.
Te midde van ’n baie besige program in die gemeente doen Nic beeldhou as ’n stokperdjie en kry bestellings van mense uit die omgewing.
Hy beleef ook een van die hoogtepunte van sy lewe toe die staatspresident, Mnr. Marais Viljoen, hom aanwys as beeldhouer om ’n een en ’n half lewensgrootte borsbeeld van hom te maak vir die Raadsaal van Johannesburg se Stadsraad en ’n ateljee vir Nic ingerig word in die presidensie waar hy elke Maandag kon werk as die president poseer.
Vandag is Nic Grobler bekend vir sy “Beeldhou met ’n Boodskap”.
PETRA MAGYAR
![Petra](https://fak.org.za/wp-content/uploads/2024/07/Petra.png)
Petra het in Hongarye grootgeword, waar sy ook as verpleegsuster gestudeer het. In 2007 het sy na Suid Afrika geïmmigreer en woon tans in Orania. Petra is ’n opkomende kunstenaar met geen formele kunsonderrig nie. Sy het reeds verskeie kunsprojekte vir haar dorp voltooi.
Haar gunstelingmediums is olieverf en houtskool. Sy het ’n groot liefde vir portretstudies en natuurlewe.
Sy glo daarin om met elke kunswerk te verbeter, elke projek is ’n uitdaging. Petra wil graag ‘n ryk nalatenskap deur haar kuns nalaat.
PIETER WENTZEL
![Pieter](https://fak.org.za/wp-content/uploads/2024/07/Pieter.png)
Pieter is in Breyten gebore en het in Bethal grootgeword waar hy sy skoolloopbaan in 1976 voltooi het. Hy studeer later verder aan die Pretoria Technikon.
As kind was Pieter altyd besig om te skets en was mal oor kuns. Hy het begin met potloodsketse, later pastelle en het in 1993 met olieverf begin eksperimenteer. Hy is grootliks beïnvloed deur ander bekende kunstenaars soos Rembrand, Pierneef, en Tinus en Gabriel de Jongh.
Nadat die Springbokke hul eerste Rugbywêreldbeker gewen het, het Pieter opdrag gekry om ’n reeks rugbyskilderye te maak waarvan sommige deur Nelson Mandela geteken is.
Pieter se passie is kuns … hy besoek graag kunsmuseums soos The National ART Gallery in Londen.
SANNETTE BOSHOFF
![sanet](https://fak.org.za/wp-content/uploads/2024/07/sanet.png)
Sannette is in 1967 in Laingsburg gebore. Sy is in 2000 met Dawie Fourie getroud en na Marloth Park verhuis. Sannette het nog altyd ’n lewendige belangstelling in kuns gehad. Sy het vir baie jare stofverf gedoen. In 2006 is Sannette se seun MJ gekies om die Suid-Afrikaanse President Ontwikkelingspan vir Gevegskuns by Groningen in Nederland te verteenwoordig. Sannette het begin skilder om die geld vir die toer in te samel.
Sedertdien het sy skilderye aan kliënte in die VSA, Duitsland, Nederland, Spanje, Australië en Suid-Afrika verkoop. In 2008 is sy genooi om ’n paneel van 2,4 m x 3,6 m vir die Samora Machel-museum by Mbuzini te doen. Die paneel is ’n moderne stuk wat die begrafnisrituele van swart stamme in Afrika suid van die Sahara uitbeeld. Die stuk is uitgevoer met slegs wrakstukke van die vliegtuig waarin Samora Machel in 1986 gesterf het.