Ons wil graag met julle deel dat Juan Boucher weens verhoogde druk op sy professionele skedule en beperkte beskikbaarheid, ongelukkig as Ghoeroe van vanjaar se Skryf’it-liedjieskryfkompetisie moes onttrek. Ons sê vir Juan opreg dankie vir sy entoesiasme en betrokkenheid, en wens hom alle sukses toe met sy toekomstige projekte. Maar moenie vrees nie – ons musiekreis gaan volstoom voort!
Ons is baie opgewonde om ons nuwe Ghoeroe aan te kondig: William Wolf!
William bring ’n skatkis van ervaring, kreatiwiteit en diep musiekkennis saam.
William het in 2002 formele opleiding in ligte musiek en jazz ontvang en is ’n stigterslid van die SAMA-benoemde groep Soul Proxy. Die groep het vyf top-5-treffers op plaaslike en nasionale radiostasies gehad, en het selfs die verhoog gedeel met SEETHER en Amy Lee van Evanescence tydens hul SA somertoer in 2002/2003.
As hoofliedjieskrywer van die groep is William as ’n top-10-liedjieskrywer gekies in die gesogte ATKV-Crescendo-kompetisie – dieselfde platform wat kunstenaars soos Joe Niemand, Reana Nel en Jack de Priester help bekendstel het.
Die afgelope 16 jaar was hy aktief as liedjieskrywer, vervaardiger, sessiemusikant en mentor in die Suid-Afrikaanse musiekbedryf. Sy kreatiewe hand lê agter die musiek van ons land se grootste kunstenaars, soos Kurt Darren, Elizma Theron, Irene-Louise van Wyk, WG Nel, Fatman, Samantha Leonard, Brendan Peyper, Heinz Winckler, Andriette Norman, Pieter Koen, Ivan Roux, Willem Botha en vele meer.
William word vandag gereken as een van die beste liedjieskrywers in Suid-Afrika, en sy insig gaan van onskatbare waarde wees vir elke Skryf’it-finalis wat nou die pad saam met hom stap.
Hou ons blad dop! Die Top-10-finaliste word vandag amptelik aangekondig, en die publieke stemme open ook – dit is jou kans om te help besluit wie na die Top 5 moet deurdring.
