Elke naam dra ’n verhaal. Elke familielyn dra die herinnering van mense wat gely, volhard en oorleef het tydens die Anglo-Boereoorlog en die konsentrasiekampe. Met hierdie genealogiese veldtog nooi die Federasie van Afrikaanse Kultuurvereniginge (FAK) die publiek uit om die name, familiebande en geskiedenis van hul voorouers met ons te deel, sodat hierdie kosbare erfenis nie verlore gaan nie.

Deur jou familie se inligting by te dra, help jy om die herinneringe van duisende vroue, kinders en families vir toekomstige geslagte te bewaar. Geskiedenis leef nie net in handboeke nie; dit leef in name, stories, grafte, Bybels, fotoalbums en die herinneringe wat van geslag tot geslag oorgedra word. Hierdie veldtog sal bydra tot ons genealogiese navorsing, maar ook ons storieveldtog wat later vanjaar uitgerol sal word.

As ons nie nou die verhale, name en herinneringe van ons families bewaar nie, kan dit vir altyd verlore raak. Elke van, elke foto en elke storie is deel van ’n groter erfenis wat deur geslagte gedra is. Help ons om die name van jou mense lewendig te hou – nie net as geskiedenis op papier nie, maar as herinneringe van regte families, regte lyding en regte lewens.

Moenie dat jou familie se verhaal stilweg verdwyn nie.

Stuur vir ons jou besonderhede en ontvang toegang toe die databasis van sterftes in konsentrasiekampe.