Met die groot Afrikaans 100 vieringe vanjaar was dit hierdie jaar ekstra lekker om die Taaldraai toer die afgelope Saterdag vir graad 8 Voortrekkers te kon aanbied in die Paarl.
Een van Kaapland Voortrekkers se vele kampe vir hoërskoolkinders het die afgelope naweek plaasgevind. Vir die graad 8 groep het Die Voortrekkers ’n program aangebied oor Afrikaanse Taalgeskiedenis.
Tydens die Taaldraai toer Saterdag is wye draaie in en om die Paarl gery na verskillende bakens wat verband hou met die taalstryd in die 18honderds toe Engelse en Nederlandse sprekers in ’n taalstryd gewikkel was te midde van die ontwaking van ’n nuwe taal wat deur Arnoldus Pannevis Afrikaans gedoop is.
Dit was Nasionale Museumdag en lekker bedrywig by die Afrikaanse Taalmuseum, destyds die huis van die wamaker Gideon Malherbe waar die Genootskap van Regte Afrikaners (GRA) op 14 Augustus 1875 gestig is, toe ons daar aankom. Na die Taalmuseum volg ’n besoek aan die Afrikaanse Taalmonument en daarvandaan kies ons koers na skole, kerke, huise, geboue en ander bakens waar die ag lede van die Genootskap van Regte Afrikaners geleef en gewerk het.
GR von Wielligh noem hulle “Skoolmeestertjies en Dalse wynboertjies” en Randal Wicomb sing van die “Ag jollie kêrels”. Hoe dit ookal sy, die 8 lede van die GRA, manne tussen die ouderdomme 20 en 42, het ’n belangrike rol gespeel om Afrikaans van ’n omgangstaal na ’n skryftaal en uiteindelik ’n volwaardige landstaal te neem.
Dit was ’n groot lekkerte om hierdie toer te doen met ’n groepie jong Voortrekkers wat positief is oor ons mooi moedertaal Afrikaans.
