𝐍𝐮𝐰𝐞 𝐦𝐮𝐬𝐢𝐞𝐤𝐯𝐫𝐲𝐬𝐭𝐞𝐥𝐥𝐢𝐧𝐠𝐬 𝐍𝐨𝐯𝐞𝐦𝐛𝐞𝐫 𝟐𝟎𝟐𝟒

Hier is tien van die jongste Afrikaanse vrystellings, onder meer ’n keurspel van bekende Voortrekkerliedjies, twee nuwe snitte deur kunstenaars wat deesdae meer gereeld kontemporêre Christelike musiek sing, ’n pa en seun se vertolking van ’n bekende patriotiese liedjie en die jongste snit deur ’n belowende Afrikaanse sangeres en liedjieskrywer wie se eerste treffer deur ’n legendariese Afrikaanse sangeres opgeneem en gewild gemaak is.

“𝐕𝐨𝐨𝐫𝐭𝐫𝐞𝐤𝐤𝐞𝐫-𝐦𝐞𝐝𝐥𝐞𝐲” – 𝐎𝐮𝐝𝐞𝐫𝐝𝐨𝐨𝐬

Ouderdoos het bekendheid verwerf vir die nuwe manier waarop hulle bekende Afrikaanse liedjies sing; hulle het al verskeie liedjies ’n harde rock-klank gegee en nou het hulle dit selfs verder gevoer. Hulle het ’n keurspel saamgestel van bekende Voortrekkerliedjies wat beslis by die jeuglede aanklank sal vind en miskien sal maak dat offisiere op ’n nuwe manier daarna sal luister. Die keurspel bestaan uit “Ken jy die land?”, “Dis net ’n worsie”, “Wandellied”, “Wat maak ’n kamp so lekker?” en “Wat maak ’n trekker?” Dit sal maak dat selfs jong lede wat dalk hul neuse vir hierdie liedjies optrek, dit opnuut, of vir die eerste keer, sal ontdek.

“𝐊𝐞𝐧 𝐣𝐲 𝐝𝐢𝐞 𝐥𝐚𝐧𝐝?” – 𝐅𝐫𝐚𝐧𝐧𝐚 𝐞𝐧 Riaan Benade

Franna Benadé was saam met sy ouer broer Innes die eerste wenners van die televisie-talentkompetisie Debuut en saam het hulle drie albums vrygestel voordat hulle elkeen hul solo-loopbane begin volg het. Franna se seun Riaan het vier jaar gelede sy debuutalbum vrygestel en bewys dat hy beslis sy pa se talent geërf het. Riaan se jongste album is vroeër vanjaar vrygestel en hy en sy pa het vir ’n verrassing gesorg deur die bekende liedjie “Ken jy die land?” op te neem. Hulle het dit by vanjaar se Afrikaans is Groot-konserte gesing en die gehoor het dit baie goed ontvang. Hulle het die kerklied “Laat Heer U seën op hul daal” aan die einde van hierdie opname ingesluit. Dit sal hopelik ’n groot radiotreffer word noudat ’n groter gehoor daaraan blootgestel is.

“𝐕𝐚𝐝𝐞𝐫 𝐀𝐛𝐫𝐚𝐡𝐚𝐦” – 𝐈𝐥𝐚𝐧 𝐯𝐚𝐧 𝐒𝐭𝐚𝐝𝐞𝐧

Ilán van Staden het veral bekendheid verwerf toe hy in die musiekblyspel Die gelofte teenoor Bernice West gespeel het. Soos Bernice het hy egter nou besluit om hom al hoe meer op kontemporêre Christelike musiek toe te spits. Met “Ek en my huis”, waarvan die video by Hoërskool Waterkloof verfilm is, het hy sy voornemens duidelik gestel en nou het hy dit met nóg ’n Christelike liedjie opgevolg. “Vader Abraham” is eintlik ’n baie bekende Christelike kinderliedjie en hy het ’n vers daarvoor bygeskryf. Dit laat ’n mens met gemengde gevoelens; natuurlik sal kinders gaande wees daaroor en dit sal veral by gesinsdienste en byeenkomste van jongmense byval vind, maar as ’n mens ’n bietjie ouer is, sal jy dalk nie daarvan hou nie.

“𝐃𝐢𝐬 ’𝐧 𝐝𝐚𝐧𝐬” – 𝐒𝐭𝐞𝐥𝐥𝐚

Stella, wie se regte naam Christelle Combrink is, is een van die mees talentvolle kunstenaars op die Afrikaanse musiektoneel. Sy kan verskeie musiekinstrumente bespeel, onder meer die klavier, trekklavier en kitaar, en sy bespeel ’n tamboeryn met haar voet soos ’n bastrom. Sy was lank stil, maar is eindelik terug met haar nuwe enkelsnit, “Dis ’n dans”. Volgens haar is dit ’n uitnodiging om net te wees wie jy is. Sy het die vermoë om die Woord van God op so ’n manier te verkondig dat dit vir almal toeganklik is, maar sonder om haar musikale integriteit prys te gee.

“𝐊𝐥𝐨𝐩” – 𝐂𝐡𝐫𝐢𝐬𝐭𝐢 𝐯𝐚𝐧 𝐍𝐢𝐞𝐤𝐞𝐫𝐤

Christi van Niekerk het onlangs groot bekendheid verwerf toe die Afrikaanse legende Laurika Rauch haar komposisie “Liewe lewe” opgeneem het. Nou is Christi terug met haar jongste enkelsnit, “Klop”, waarin sy sing van die verlange na haar familie aangesien sy gereeld op die lang pad is, en die wete dat hulle vir haar wag en altyd bid dat sy veilig sal wees. Sy sing ook van iemand spesiaals wat in die Vrystaat wag. Die pragtige Ford Zodiac Merk 2 in die musiekvideo verdien ook ’n spesiale vermelding. Hopelik sal hierdie liedjie maak dat Christi erken word as ’n kunstenaar in eie reg, want sy is sonder twyfel een van die mees talentvolle liedjieskrywers wat die laaste tyd op die toneel verskyn het.

“𝐒𝐨𝐧𝐝𝐞𝐫 𝐨𝐦 𝐭𝐞 𝐠𝐫𝐨𝐞𝐭” – 𝐂𝐨𝐟𝐟𝐞𝐞𝐬𝐧𝐨𝐛𝐬

Die Briels se liedjie “Trein na Pretoria” het deur die jare gemengde reaksie by Afrikaanse musiekliefhebbers uitgelok, maar dat dit ’n legendariese liedjie is, is ’n feit. Nou het die egpaar Marius en Vernette Wessels, wat die sangpaar Coffeesnobs vorm, hierdie liedjie nuut verwerk. Anders as soortgelyke verwerkings van nuwe liedjies het hulle regtig met iets besonders vorendag gekom deurdat hulle ’n dieper betekenis daaraan gegee het. Hulle worstel met die gedagte dat sommige mense wat ’n mens liefhet, soms net uit jou lewe verdwyn sonder om te groet. Daar is seker min mense wat nie al so iets ervaar het nie. Hierdie liedjie is dalk gebaseer op ’n bekende een, maar dit is die luister werd.

“𝐑𝐢𝐛𝐛𝐞𝐭𝐣𝐢𝐞” – 𝐁𝐨𝐤 𝐯𝐚𝐧 𝐁𝐥𝐞𝐫𝐤 𝐞𝐧 𝐁𝐞𝐫𝐧𝐢𝐜𝐞 𝐖𝐞𝐬𝐭

Bok van Blerk en Bernice West het vir die eerste keer saamgespan met die temaliedjie uit die musiekblyspel Die Afrikaner maak so. Nou het hulle weer so gemaak met nog ’n liedjie wat deur Johan Vorster en Jacomien de Wet (Jan de Wet se dogter) geskryf is en waarin hulle sing van beste vriende wat verlief raak. Dit gaan vir seker ’n groot treffer word!

“𝐎𝐩 𝐝𝐢𝐞 𝐩𝐥𝐚𝐚𝐬” – 𝐌𝐚𝐫𝐢𝐮𝐬 𝐖𝐢𝐥𝐥𝐞𝐦𝐬𝐞

Baie mense het die begeerte om van die stadslewe af weg te breek en op ’n plaas te woon, maar die druk van die samelewing om ’n tersiêre kwalifikasie te kry, asook ouers se verwagtinge van hul kinders, verhinder hulle om dit te doen. Marius se debuut-enkelsnit, wat Jade Stom en Neil Somers saam met hom geskryf het, vertel die storie van iemand wat gedoen het wat die samelewing van hom verwag het, maar nou die vryheid van die plaaslewe geniet. Dit is ’n snit wat by ’n groot gehoor aanklank sal vind.

“𝐀𝐟𝐫𝐢𝐤𝐚𝐚𝐧𝐬 𝐡𝐞𝐭 𝐧𝐢𝐞 𝐛𝐫𝐢𝐞𝐤𝐞 𝐧𝐢𝐞” – 𝐀𝐧𝐝𝐫𝐢𝐞̈𝐭𝐭𝐞

Dis moeilik om te glo dat Andriëtte al byna twintig jaar op die musiektoneel is. Sy het haarself gevestig as een van ons land se gewildste sangeresse en sy het tot dusver ’n spul treffers gehad, veral “Sewe oseane”, “Bittesoet van liefde”, “Druppel in die see”, “Pêrel vir ’n kroon” en “Vlerke in die wind”. Nou is sy terug met haar jongste enkelsnit, “Afrikaans het nie brieke nie”, wat sy saam met Emil Struwig geskryf het. Daar is baie mense wat glo dat danstreffers oppervlakkig en platvloers is of moet wees, maar met hierdie liedjie bewys sy dat dit nie die geval hoef te wees nie. Dit is een van die lekkerste treffers van die jaar en dit sal die dansvloere sommer vinnig vol kry! Andriëtte het die kol met hierdie een getref!

“𝐊𝐥𝐚𝐚𝐫 𝐠𝐞𝐰𝐞𝐞𝐭” – 𝐋𝐢𝐬𝐢𝐞 𝐁𝐚𝐬𝐬𝐨𝐧

Nog ’n voormalige deelnemer aan Die Kontrak wat haarself in die musiekbedryf gevestig het, is Lisie Basson. Hoewel haar klank na alternatiewe rock toe neig, is dit steeds kommersieel toeganklik; sy het trouens groot sukses met haar debuut-enkelsnit, “23”, behaal. Haar jongste enkelsnit, “Klaar geweet”, is pas vrygestel; hierin sing sy van ’n nuwe verhouding en die wete dat daardie persoon ’n

groot rol in jou lewe gaan speel. Die vervaardiger van die musiekvideo was Georic Lomas, wat sy al jare lank ken. Sy is beslis ’n uiters talentvolle sangeres wat dit nog ver gaan bring; die feit dat sy ’n elektriese kitaar kan bespeel, tel baie sterk in haar guns!

– Daantjie Badenhorst