𝐁𝐮𝐟𝐟𝐞𝐥𝐬𝐟𝐨𝐧𝐭𝐞𝐢𝐧 𝐁𝐫𝐚𝐧𝐝𝐞𝐰𝐲𝐧 𝐦𝐚𝐚𝐤 𝐫𝐮𝐢𝐦 𝐬𝐤𝐞𝐧𝐤𝐢𝐧𝐠 𝐭𝐲𝐝𝐞𝐧𝐬 𝐟𝐞𝐞𝐬𝐭𝐲𝐝

Die Voortrekkermonument en die FAK is diep geraak deur ’n ongelooflike daad van vrygewigheid wat werklik die gees van die feestyd vasvang!

As deel van die Gelofteweek-feesvieringe bied die VTM ’n somerpret-vakansieprogram aan vir kinders van 5-13 jaar oud. Buffelsfontein Brandewyn het besluit dat hulle ook deel wil wees van hierdie storie en het dit vir kinders van die President Kruger-kinderhuis moontlik gemaak om ook aan die pret en feestelikheid te kom deelneem.

Henk Maree, bedryfshoof van die Voortrekkermonument, was verheug toe hy hoor van die pragtige gebaar.

“Om op hierdie kinders se gesiggies te sien hoe hulle dit geniet om te swem in hierdie warm son, en hoe lekker hulle speel, laat mens regtig ’n warm gevoel kry,” sê Maree.

Hierdie borgskap herinner ons aan die opregte krag van gee en die vreugde om betekenisvolle ervarings vir die volgende generasie te skep.

“Die kinders het dit ongelooflik baie geniet! Hulle het heerlike worsbroodjies gehad, lekker geswem en gespeel op die glybaan. Hierdie geleentheid wat Buffelsfontein vir hulle moontlik gemaak het, is presies waaroor die feestyd gaan,” meen Vianca Bodenstein, projekbeampte van die Voortrekkermonument.

Ichnus Wait, medestigter van Buffelsfontein Brandewyn, beklemtoon dat liefdadigheid ’n kernsaak vir die groep is.

“By die Buffelsfontein Groep is ons verbintenis tot liefdadigheid gebou op ’n fondament van deernis en omgee. Deur ons opregte werk met baie verskillende kinderhuise en welsynsorganisasies wat met kinders te doen het, streef ons daarna om ’n blywende verskil te maak in die lewens van diegene wat dit die nodigste het, om te verseker dat elke kind die geleentheid het om te groei, te floreer en hul volle potensiaal te bereik,” sê Wait.

Dankie, Buffelsfontein, dat julle ’n verskil in hierdie jong lewens gemaak het! Saam versprei ons die gees van hoop, vreugde en gemeenskap tydens hierdie feestyd.