𝟏𝟐𝟎 𝐣𝐚𝐚𝐫 𝐥𝐚𝐭𝐞𝐫 𝐯𝐨𝐥𝐠 𝐝𝐢𝐞 𝐅𝐀𝐊 𝐝𝐢𝐞 𝐬𝐩𝐨𝐫𝐞 𝐯𝐚𝐧 𝐏𝐚𝐮𝐥 𝐊𝐫𝐮𝐠𝐞𝐫

“Vandag gaan ons op ’n reis deur die geskiedenis van Oom Paul.”

So vertel Charles Rademeyer, kultuurkoördineerder van die Federsasie van Afrikaanse Kultuurvereniginge (FAK), wat vandag, 120 jaar na die afsterwe van die legendariese Paul Kruger, op ’n ontdekkingsreis in Pretoria gegaan het om die president van die Zuid-Afrikaansche Republiek (ZAR) se lewe en nalatenskap te vier.

Die FAK het op 14 Julie saam met ’n groep erfenisliefhebbers die spore van Oom Paul Kruger gevolg met ’n opwindende toer regoor Pretoria.

“120 jaar na sy afsterwe onthou ons steeds en is sy impak op ons eie voetspore steeds sigbaar,” vertel Rademeyer.

“Ons het ons toer vandag afgeskop by die Melrosehuis; waar die Boeregeneraals ’n keuse moes maak om die oorlog tot ’n einde te bring ter wille van die vroue en kinders in die konsentrasiekampe.”

Na ’n emosionele besoek aan die huis waar die Vrede van Vereeniging onderteken is, het Rademeyer en die groep beweeg na die ou ZAR-Raadsaal en Kerkplein, “sonder die ou kerk, maar met ’n merkwaardige beeld van Oom Paul wat steeds sy verhaal vertel.”

“Op hierdie reis kon ons gaan sit op die stoep waar Oom Paul en Tannie Gezina ontspan het en ons kon oorstap na die eerste Gereformeerde Kerk in Suid-Afrika wat sy verhaal, sy nalatenskap en sy menswees vir die kort oomblik tasbaar gemaak het,” sê Rademeyer.

Na hulle “by Oom Paul aan huis was”, het die groep besoek afgelê by die Heldeakker waar die grafte van beide Paul en Gezina Kruger en hul kinders is.

Rademeyer vertel dat hierdie besoek aan die Heldeakker mens nederig laat omdat jy opnuut besef wat Kruger se nalatenskap vir ons beteken het.

“In die Heldeakker staan ons voor ’n reus se graf, waar hy sy ewige rusplek gevind het; voor ons staan die woorde van 1 Petrus 5:7 voor ons soos ֹ’n opdrag – ‘Werp al jul bekommernisse op die Here’, en opnuut besef mens dat die Afrikaner se geskiedenis gebou is op ’n sterk fondasie van geloof en jy kry weer hoop vir die toekoms,” sluit Rademeyer af.

Die toer het afgesluit by die Voortrekkermonument waar Kruger se sterfkamer twee dae gelede vir die eerste keer bekendgestel is.

“’n Kort toer soos hierdie is nie net ’n historiese reis nie, maar ’n herinnering aan die opofferings van dié wat voor ons gekom het én ’n opdrag om die fakkel oor te neem en die lig te word wat ons die toekoms in kan dra. Om Paul Kruger sélf aan te haal ‘𝑁𝑒𝑒𝑚 𝑢𝑖𝑡 𝑑𝑖𝑒 𝑣𝑒𝑟𝑙𝑒𝑑𝑒 𝑎𝑙𝑙𝑒𝑠 𝑤𝑎𝑡 𝑔𝑜𝑒𝑑 𝑒𝑛 𝑚𝑜𝑜𝑖 𝑖𝑠 𝑒𝑛 𝑏𝑜𝑢 𝑑𝑖𝑒 𝑡𝑜𝑒𝑘𝑜𝑚𝑠 𝑑𝑎𝑎𝑟𝑜𝑝’.”

𝐕𝐢𝐫 𝐦𝐞𝐞𝐫 𝐧𝐮𝐮𝐬 𝐨𝐨𝐫 𝐝𝐢𝐞 𝐅𝐀𝐊 𝐬𝐞 𝐤𝐮𝐥𝐭𝐮𝐮𝐫𝐧𝐞𝐭𝐰𝐞𝐫𝐤𝐞 𝐤𝐨𝐧𝐭𝐚𝐤 𝐠𝐞𝐫𝐮𝐬 𝐯𝐢𝐫 charles@kultuurtuiste.org.za