Kom verken die Kompanjiestuin saam met die FAK. Die tuin is nie net bekend daarvoor dat dit die oudste openbare tuin in Suid-Afrika is nie, maar huisves ook monumente en bakens van groot historiese waarde uit die VOC- en Eerste Wêreldoorlog-tydperk. Die tuin met sy ryke geskiedenis, huisves meer as 50 besienswaardighede, elkeen met ’n unieke storie.
Kom bederf jouself met ’n lekker dagaktiwiteit in die pragtige Kompanjiestuin en leer op ’n prettige manier die VOC en Kaapse storie ken. Die skattejag vind in spanverband (nie groter as 6 per span nie) plaas, maar individuele inskrywings is ook welkom.
Pak jou piekniekrugsak, trek aan jou stapskoene en kom deel in hierdie spesiale dag wanneer ons die geskiedenis van Kaapstad bietjie ontgin.
