Vandag, op 14 Augustus, kom die Afrikaanse taalgemeenskap bymekaar om Nasionale Afrikaanse Taaldag te vier, ter viering van 149 jaar sedert die stigting van die Genootskap van Regte Afrikaners (GRA) in die Paarl, Wes-Kaap.
Die GRA, wat in 1875 gestig is, het ’n deurslaggewende rol gespeel in die erkenning en bevordering van Afrikaans as ’n taal in die Parlement, skole, die staatsdiens en die breër samelewing. Hierdie dag herdenk nie net die geboorte van Afrikaans nie, maar dien ook as ’n herinnering aan die ryk kulturele erfenis wat die taal vergestalt.
Die GRA se missie was veel meer as taalkundige erkenning; dit het gegaan oor die kweek van ’n eiesoortige Afrikaneridentiteit gewortel in die godsdiens, geskiedenis en kulturele waardes van sy mense. Hierdie visie het eindelik gegroei tot ’n breër beweging wat steeds in die Afrikaanssprekende gemeenskap floreer.
Tydens die vergadering in die Paarl is daar besluit om die volk bewus te maak van homself en sy taal en om Afrikaans tot sy regmatige plek te verhef. Indien Afrikaans algemeen in gebruik is, sou die Bybelvertaling waarna Arnoldus Pannevis gestrewe het, ’n werklikheid word. Dit is dan ook na aanleiding van Arnoldus Pannevis se korrespondensie met die Britse en Buitelandse Bybelgenootskap oor die vertaling van die Bybel in Afrikaans dat die vergadering plaasgevind het. By die vergadering is oorgegaan tot die stigting van die GRA en die stigterslede was: CP Hoogenhout, DF du Toit (Oom Lokomotief), SJ du Toit, A Ahrbeck, SG du Toit, G Malherbe, DF du Toit (Dokter) en PJ Malherbe.
In pas met die gees van hierdie dag is die Federasie van Afrikaanse Kultuurvereniginge (FAK) trots om Taalweek te vier met projekte wat reeds aangepak is wat die blywende passie vir die bou en bewaar van Afrikaans weerspieël. Hoërskool Langenhoven in Riversdal het op 12 Augustus Langenhovendag, ’n jaarlikse herdenking van CJ Langenhoven se verjaardag, gevier. Vir 20 jaar staan Afrikaans-onderwyseres Martha de Beer aan die spits van hierdie viering en verseker dat die nalatenskap van Langenhoven, ’n sleutelfiguur in die amptelike erkenning van Afrikaans in 1925, lewendig bly in die harte en gedagtes van haar leerlinge.
Ter erkenning van haar toewyding het die FAK ’n FAK-toekenning vir uitnemendheid aan De Beer oorhandig. Hierdie toekenning vereer haar onwrikbare verbintenis tot die kweek van ’n diep liefde vir Afrikaans onder haar leerlinge en haar pogings om die kulturele erfenis wat met die taal geassosieer word, te bewaar.
