𝐇𝐞𝐥𝐞𝐧 𝐅𝐚𝐛𝐞𝐫: 𝐣𝐨𝐧𝐠 𝐭𝐚𝐥𝐞𝐧𝐭 𝐬𝐤𝐢𝐭𝐭𝐞𝐫 𝐛𝐲 𝐝𝐢𝐞 𝐅𝐀𝐊 𝐈𝐧𝐭𝐞𝐫𝐧𝐚𝐬𝐢𝐨𝐧𝐚𝐥𝐞 𝐀𝐟𝐫𝐢𝐤𝐚𝐚𝐧𝐬-𝐄𝐤𝐬𝐩𝐨

“Drie woorde: Ongelooflik, onbeskryflik, onmoontlik!” Het Helen gesê oor haar oorwinning in die ope-afdeling. “My droom is om eendag ’n gepubliseerde skrywer te wees, maar ek het so bietjie in myself getwyfel toe ek vanjaar ingeskryf het. Dit voel steeds onwerklik.”

Omdat Helen haarself wou uitdaag, het sy vir ’n hele klomp kategorieë ingeskryf.

“My gunstelingkategorie om voor in te skryf, is gewoonlik die kortverhaal, aangesien dit net die regte lengte is om kreatief te wees, maar nie van die storie af te dwaal nie. Hierdie jaar het ek besluit om uit my gemaksone te tree en vir soveel as moontlik kategorieë in te skryf,” het sy gesê. Sy het ’n kortverhaal, drie gedigte, ’n opstel en ’n resensie ingeskryf.

Helen vind inspirasie in die alledaagse lewe. “Inspirasie is oral – in ’n vreemdeling se glimlag, ’n interessante gebou of ’n foto op Pinterest,” het sy gedeel. Haar stories en gedigte is geïnspireer deur die mense vir wie sy lief is. “Daar is niks soos liefde om jou oor die toekoms te laat dink nie,” het sy gesê.

Haar resensie het gehandel oor haar gunsteling- Afrikaanse fliek, Vir die Voëls, terwyl haar opstel oor haar skooldae gehandel het en hoe dit haar oor die toekoms laat dink het.

Hierdie oorwinning is net die begin vir Helen. Met haar passie vir skryf en dryfkrag om te groei, sal sy verseker nuwe hoogtes bereik.