𝐊𝐫𝐮𝐠𝐞𝐫𝐬𝐝𝐨𝐫𝐩-𝐆𝐞𝐬𝐤𝐢𝐞𝐝𝐞𝐧𝐢𝐬𝐭𝐨𝐞𝐫 𝐥𝐚𝐚𝐭 𝐩𝐥𝐚𝐚𝐬𝐥𝐢𝐤𝐞 𝐞𝐫𝐟𝐞𝐧𝐢𝐬 𝐥𝐞𝐞𝐟

Die Krugersdorp-Geskiedenistoer wat vanjaar weer deur die FAK se plaaslike kultuurnetwerk aangebied is, het die inwoners van die dorp sowel as besoekers van buite ’n terugblik gegee op die dorp se geskiedenis en weer trots gekweek onder mekaar.

Charles Rademeyer, FAK-kultuurkoördineerder sê hierdie toer is ten doel om die belangrike geskiedkundige punte in Krugersdorp weer aan die publiek bekend te stel.

Die voorsitter van die Krugersdorp Kultuurnetwerk, Freddie Hardman, het tydens die toer stories van saamstaan, swaarkry, van goeie en swaar tye in die geskiedenis van die dorp vertel. Hardman is ’n ywerige erfenisliefhebber en het elke besoeker geïnspireer en opnuut laat besef waarom hul erfenis belangrik is.

Die toer het afgeskop by ’n baie unieke fontein in die Pretorius-park, waar die Krugersdorp-kommando in 1880 vergader het met die anneksasie van die Republiek van Transvaal.

Hierdie fontein het ook gedien as ’n punt waar die burgers, asook die perde kon water drink en vars kon vertrek op kommando teen die Britte.

Daarna het die groep na Queen’s Battery, waar die kommando gehelp het om die Jameson-inval te keer, vertrek.

Hiér, vertel Rademeyer, sien mens die landskap en besef opnuut watter uitdagings voor die kommando gelê het.

“Om op só ’n toer besoek te kan aflê op die presiese plekke waar die verhale uit ons geskiedenis afgespeel het, is werklik spesiaal. Dit is asof jy sélf deel is van die verhaal en nie net ’n toeskouer nie,” sê Rademeyer.

“Die besoekpunt hierna was die ou Z.A.R. Polisiestasie wat in 1897 gebou is en die toer het afgesluit met ’n wonderlike verassing – in die middel van Krugersdorp is ’n baie ou jakarandaboom; by hierdie einste boom het Oom Paul Kruger gereeld in sy skadu ontspan en het vandaar besluit om die Ou Toppies Club te help stig, waar persone van die dorp byeen kan kom om te ontspan, maar ook is gesprekke gevoer om ’n beter toekoms te skep.”

Rademeyer meen ’n toer soos hierdie maak mens se oë weer oop na hoe ryk Krugersdorp se erfenis is. Dit laat jou met ander oë die dorp verken en dit maak mens weer trots op dit wat ons het.

“Deur toere soos hierdie by te woon, leer ’n mens soveel meer, maar meer as dit laat dit die verhale voortleef en só kan elkeen bydra tot die behoud van ons erfenis.”